శ్రీ తత్త్వార్యా స్తవః (Sri Thathvarya Stavah)
శివకామసున్దరీశం శివగఙ్గాతీరకల్పితనివేశమ్ ।
శివమాశ్రయే ద్యుకేశం శివమిచ్ఛన్మా వపుష్యభినివేశమ్ ॥ ౧॥
గీర్వాణచక్రవర్తీ గీశ్చేతోమార్గదూరతోవర్తీ ।
భక్తాశయానువర్తీ భవతు నటేశోఽఖిలామయనివర్తీ ॥ ౨॥
వైయాఘ్రపాదభాగ్యం వైయాఘ్రం చర్మ కంచన వసానమ్ ।
వైయాకరణఫణీడ్యం వైయాసిక్యా గిరా స్తుతం ప్రణుమః ॥ ౩॥
హాటకసభానివాసః శాటకతాపన్నసకలహరిదన్తః ।
ఘోటకనిగమో మాయానాటకసాక్షీ జగత్పతిర్జయతి ॥ ౪॥
శైలూషరాజమాద్యం మాలూరప్రసవమాలికాభరణమ్ ।
పీలూపమోఽన్ధుజీర్యచ్ఛాలూరాభః కథం విజానీయామ్ ॥ ౫॥
కనకసభైకనికేతం కఠినపురాణోక్తిసారసంకేతమ్ ।
నారాధయన్తి కే తం నారాయణ్యా యుతం స్వతోకేతమ్ ॥ ౬॥
తిల్లవనే క్షుల్లవనే పల్లవసంభిన్నఫుల్లపుష్పఘనే ।
చిల్లహరీముల్లలయన్ వల్లభయా భిల్లతల్లజో నటతి ॥ ౭॥
వైరాజహృత్సరోజే వైరాజాద్యైః స సామభిః స్తవ్యః ।
వైరాగ్యాదిగుణాఢ్యైః వైరాద్యుత్సృజ్య దృశ్యతే నృత్యన్ ॥ ౮॥
ఢక్కానినదైః సూత్రాణ్యఙ్గదనాదైరహో మహద్భాష్యమ్ ।
వ్యాకరణస్య వివృణ్వన్ నృత్యతి భృత్యాన్ కృతార్థయన్ మర్త్యాన్ ॥ ౯॥
నటనాయక నటనాయ క ఇహ సుకృతీ నో తవ స్పృహయేత్ ।
మన్ఽజులతామఞ్జులతామహితే వస్తుం చ తిల్లవనే ॥ ౧౦॥
అతిదురితోత్తారకృతే చిరధృతహర్షః సభాపతిః సద్యః ।
అగణేయాఘఘనం మామాసాద్యానన్దమేదురో నటతి ॥ ౧౧॥
మత్పాదలగ్నజనతాముద్ధర్తాస్మీతి చిత్సభానాథః ।
తాణ్డవమిషోద్ధృతైకసవాఙ్ఘ్రిః సర్వాన్ విబోధయతి ॥ ౧౨॥
ఆపన్నలోకపాలిని కపాలిని స్త్రీకృతాఙ్గపాలిని మే ।
శమితవిధిశ్రీశరణే శరణా ధీరస్తు చిత్సభాశరణే ॥ ౧౩॥
భిక్షుర్మహేశ్వరోఽపి శ్రుత్యా ప్రోక్తః శివోఽప్యుగ్రః ।
అపి భవహారీ చ భవో నటోఽపి చిత్రం సభానాథః ॥ ౧౪॥
నృత్యన్నటేశమౌలిత్వఙ్గద్గఙ్గాతరఙ్గశీకరిణః ।
భూషాహిపీతశిష్టాః పునన్తు మాం తిల్లవనవాతాః ॥ ౧౫॥
కనకసభాసమ్రాజో నటనారమ్భే ఝలంఝలంఝలితి ।
మఞ్జీరమఞ్జునినదా ధ్వనియుః శ్రోత్రే కదా ను మమ ॥ ౧౬॥
పర్వతరాజతనూజాకుచతటసంక్రాన్తకుఙ్కుమోన్మిశ్రాః ।
నటనార్భటీవిధూతా భూతికణాస్తే స్పృశేయురపి మేఽఙ్గమ్ ॥ ౧౭॥
నటనోచ్చలత్కపాలామర్దితచన్ద్రక్షరత్సుధామిలితాః ।
ఆదినటమౌలితటినీపృషతో గోత్రేఽత్ర మే స్ఖలేయుః కిమ్ ॥ ౧౮॥
పశ్యాని సభాధీశం కదా ను తం మూర్ధని సభాధీశమ్ ।
యః క్షయరసికం కాలం జితవాన్ ధత్తే చ శిరసి కఙ్కాలమ్ ॥ ౧౯॥
తనుజాయాతనుజాయాసక్తానాం దుర్లభం సభానాథమ్ ।
నగతనయా నగతనయా వశయతి దత్త్వా శరీరార్ధమ్ ॥ ౨౦॥
ఆనన్దతాణ్డవం యస్తవేశ పశ్యేన్న చాపి నృగణే యః ।
స చ స చ న చన్ద్రమౌలే విద్వద్భిర్జన్మవత్సు విగణేయః ॥ ౨౧॥
కామపరవశం కృత్వా కామపరవశం త్వకృత్వా మామ్ ।
కనకసభాం గమయసి రే కనకసభాం హా న యాపయసి ॥ ౨౨॥
నటనం విహాయ శంభోర్ఘటనం పీనస్తనీభిరాశాస్సే ।
అటనం భవే దురన్తే విట నన్దసి న స్వభూమసుఖమ్ ॥ ౨౩॥
కలితభవలఙ్ఘనానాం కిం కరైవ చిత్సుఖఘనానామ్ ।
సుముదాం సాపఘనానాం శివకామేశ్యాః కృపామృతఘనానామ్ ॥ ౨౪॥
నినిలీయే మాయాయాం న విలియే వా శుచా పరం లీయే ।
ఆనన్దసీమని లసత్తిల్లవనీధామని స్వభూమని తు ॥ ౨౫॥
అధిహేమసభం ప్రసభం బిసభఙ్గవదాన్యధన్యరుచమ్ ।
శ్రుతగలగరలం సరలం నిరతం భక్తావనే భజే దేవమ్ ॥ ౨౬॥
సభయా చిత్సభయాసీన్మాయా మాయాప్రబోధశీతరుచేః ।
సుహితా ధీః సుహితా మే సోమా సోమార్ధధారిణీ మూర్తిః ॥ ౨౭॥
పత్యా హేమసభాయాః సత్యానన్దైకచిద్వపుషా ।
కత్యార్తా న త్రాతా నృత్యాయత్తేన మాదృశా మర్త్యాః ॥ ౨౮॥
భజతాం ముముక్షయా త్వాం నటేశ లభయాస్త్రయః పుమర్థాశ్చ ।
ఫలలిప్సయామ్రభాజాం ఛాయాసౌరభ్యమాధవ్య ఇవ ॥ ౨౯॥
కఞ్చుకపఞ్చకనద్ధం నటయసి మాం కిం నటేశ నాటయసి ।
నటసి నిరావృతిసుఖితో జహి మాయాం త్వాదృశోఽహమపి తత్ స్యామ్ ॥ ౩౦॥
ఆస్తాం నటేశ తద్యన్నటతి భవానమ్బరే నిరాలమ్బే ।
త్వన్నటనేఽపి హి నటనం వేదపురానాగమాః సమాదధతి ॥ ౩౧॥
వేధసి సర్వాధీశేఽమేధసి వా మాదృశే సరూపకృతా ।
రోధసి శివగఙ్గాయా బోధసిరా కాచిదుల్లసతి ॥ ౩౨॥
హట్టాయితం విముక్తేః కుట్టాకం తం భజామి మాయాయాః ।
భట్టారకం సభాయాః కిట్టాత్మన్యఙ్గకే త్యజన్మమతామ్ ॥ ౩౩॥
శ్రీమచ్చిదమ్బరేశాదన్యత్రానన్దతాణ్డవాసక్తాత్ ।
బ్రాహ్మం లక్షణమాస్తే కుత్రచిదానన్దరూపతా దేవే ॥ ౩౪॥
క్షుల్లకకామకృతేఽపి త్వత్సేవా స్యాద్విముక్తిమపి దాత్రీ ।
పీతామృతోఽప్యుదన్యాశాన్త్యై స్యాచ్చిత్సభాధిపామర్త్యః ॥ ౩౫॥
సత్యం సత్యం గత్యన్తరముత్సృజ్య తే పదాపాత్యమ్ ।
అత్యన్తార్తం భృత్యం న త్యజ నిత్యం నటేశ మాం పాహి ॥ ౩౬॥
షట్త్రింశతా తత్త్వమయీభిరాభిః సోపానభూతాభిరుమాసహాయమ్ ।
ఆర్యాభిరాద్యం పరతత్త్వభూతం చిదమ్బరానన్దనటం భజధ్వమ్ ॥ ౩౭॥
ఇతి శ్రీ తత్త్వార్యా స్తవః సమ్పూర్ణం
