దేవి భాగవతాంతర్గత శ్రీ గాయత్రి దేవీ స్తోత్రం (Sri Gayatri Devi Stotram)
నారద ఉవాచ
భక్తానుకంపిన్సర్వజ్ఞ హృదయం పాపనాశనమ్ ।
గాయత్ర్యాః కథితం తస్మాద్గాయత్ర్యాస్తోత్రమీరయ । 1 ।
శ్రీ నారాయణ ఉవాచ
ఆదిశక్తి జగన్మాత ర్భక్తానుగ్రహకారిణి |
సర్వత్ర వ్యాప్తికే నంతే త్రిసంధ్యే తే నమోస్తు తే || 2 ||
త్వమేవ సంధ్యా గాయత్రీ సావిత్రీ చ సరస్వతీ |
బ్రాహ్మీ చ వైష్ణవీ రౌద్రీ రక్తా శ్వేతా సితేతరా || 3 ||
ప్రాతర్బాలా చ మధ్యాహ్నే యౌవనస్థా భవేత్పునః ।
వృద్ధా సాయం భగవతీ చింత్యతే మునిభిస్సదా || 4 ||
హంసస్థా గరుడారూఢా తథా వృషభవాహినీ ।
ఋగ్వేదాధ్యాయినీ భూమౌ దృశ్యతే యా తపస్విభిః || 5 ||
యజుర్వేదం పఠంతీ చ అంతరిక్షే విరాజతే |
సా సామగాపి సర్వేషు భ్రామ్యమాణా తథా భువి || 6 ||
రుద్రలోకం గతా త్వం హి విష్ణులోకనివాసినీ ।
త్వమేవ బ్రహ్మణో లోకే మర్త్యానుగ్రహకారిణీ || 7 ||
సప్తర్షిప్రీతిజననీ మాయా బహువరప్రదా ।
శివయోః కరనేత్రోత్థా హ్యశ్రుస్వేదసముద్భవా || 8 ||
ఆనందజననీ దుర్గా దశధా పరిపఠ్యతే ।
వరేణ్యా వరదా చైవ వరిష్టా వరవర్ణినీ || 9 ||
గరిష్ఠా చ వరార్హా చ వరారోహా చ సప్తమీ ।
నీలగంగా తథా సంధ్యా సర్వదా భోగమోక్షదా || 10 ||
భాగీరథీ మర్త్యలోకే పాతాళే భోగవత్యపి ।
త్రిలోకవాహినీ దేవీ స్థానత్రయనివాసినీ || 11 ||
భూర్లోకస్థా త్వమేవాసి ధరిత్రీ లోకధారిణీ ।
భువో లోకే వాయుశక్తిస్స్వర్లోకే తేజసాం నిధిః || 12 ||
మహర్లోకే మహాసిద్ధిర్జనలోకే జనేత్యపి |
తపస్వినీ తపోలోకే సత్యలోకే తు సత్యవాక్ || 13 ||
కమలా విష్ణులోకే చ గాయత్రీ బ్రహ్మలోకదా ।
రుద్రలోకే స్థితా గౌరీ హరార్ధాంగనివాసినీ || 14 ||
అహమో మహతశ్చైవ ప్రకృతిస్త్వం హి గీయసే ।
సామ్యావస్థాత్మికా త్వం హి శబలబ్రహ్మరూపిణీ | 15 ||
తతః పరా పరా శక్తిః పరమా త్వం హి గీయసే ।
ఇచ్ఛాశక్తిః క్రియాశక్తిః జ్ఞానశక్తిస్త్రిశక్తిదా || 16 ||
గంగా చ యమునా చైవ విపాశా చ సరస్వతీ |
సరయూర్దేవికా సింధుర్నర్మదైరావతీ తథా || 17 ||
గోదావరీ శతద్రూశ్చ కావేరీ దేవలోకగా
కౌశికీ చంద్రభాగా చ వితస్తా చ సరస్వతీ || 18 ||
గండకీ తాపినీ తోయా గోమతీ వేత్రవత్యపి ।
ఇడా చ పింగళా చైవ సుషుమ్నా చ తృతీయకా || 19 ||
గాంధారీ హస్తిజిహ్వా చ పూషా పూషా తథైవ చ |
అలంబుసా కుహూశ్చైవ శంఖినీ ప్రాణవాహినీ || 20 ||
నాడీ చ త్వం శరీరస్థా గీయసే ప్రాక్తనైర్బుధైః ।
హృత్పద్మస్థా ప్రాణశక్తిః కంఠస్థా స్వప్ననాయికా || 21 ||
తాలుస్థా త్వం సదాధారా బిందుస్థా బిందుమాలినీ |
మూలే తు కుండలీశక్తి ర్వ్యాపినీ కేశమూలగా || 22 ||
శిఖామధ్యాసనా త్వం హి శిఖాగ్రే తు మనోన్మనీ ।
కిమన్యద్బహునోక్తేన యత్కించిజ్జగతీత్రయే || 23 ||
తత్సర్వం త్వం మహాదేవి శ్రియే సంధ్యే నమోస్తు తే |
ఇతీదం కీర్తితం స్తోత్రం సంధ్యాయాం బహుపుణ్యదమ్ || 24 ||
మహాపాపప్రశమనం మహాసిద్ధివిధాయకమ్ ।
య ఇదం కీర్తయేతోత్రం సంధ్యాకాలే సమాహితః || 25 ||
అపుత్రః ప్రాప్నుయాత్పుత్రం ధనార్థీ ధనమాప్నుయాత్ ।
సర్వతీర్థ తపోదాన యజ్ఞయోగఫలం లభేత || 26 ||
భోగాన్భుక్త్వా చిరం కాలమంతే మోక్షమవాప్నుయాత్ |
తపస్విభిః కృతం స్తోత్రం స్నానకాలే తు యః పఠేత్ || 27 ||
యత్ర కుత్ర జలే మగ్నస్సంధ్యా మజ్జనజం ఫలమ్ ।
లభతే నాత్ర సందేహ స్సత్యం సత్యం చ నారద || 28 ||
శృణుయాద్యో పి తద్భక్త్యా స తు పాపాత్ప్రముచ్యతే |
పీయూషసదృశం వాక్యం సంధ్యోక్తం నారదేరితమ్ || 29 ||
ఇతి శ్రీ దేవీభాగవతే మహాపురాణే అష్టాదశసాహస్రాం సంహితాయాం ద్వాదశస్కంధే పంచమోధ్యాయః
