శ్రీ మహాలక్ష్మీ దండకం (Sri Mahalakshmi Dandakam)
మందారమాలాంచితకేశభారాం మందాకినీనిర్ఝరగౌరహారామ్ ।
వృందారికావందితకీర్తిపారాం వందామహే మాం కృతసద్విహారామ్ ॥ 1 ॥
జయ దుగ్ధాబ్ధితనయే జయ నారాయణప్రియే ।
జయ హైరణ్యవలయే జయ వేలాపురాశ్రయే ॥ 2 ॥
జయ జయ జనయిత్రి వేలాపురాభ్యంతరప్రస్ఫురత్స్ఫారసౌధాంచితోదారసాలాంతరాగారఖేలన్మురారాతిపార్శ్వస్థితే ।
క్లృప్తవిశ్వస్థితే ।
చిత్రరత్నజ్వలద్రత్నసానూపమప్రత్నసౌవర్ణకోటీరకాంతిచ్ఛటాచిత్రితాచ్ఛాంబరే । దేవి దివ్యాంబరే ।
ఫుల్లసన్మల్లికామాలికాప్రోల్లసన్నీలభోగీశభోగప్రతీకాశవేణ్యర్ధచంద్రాలికే । వల్గునీలాలకే ।
కేశసౌరభ్యలోభభ్రమత్స్థూలజంబూఫలాభాలిమాలాసమాకర్షణేహోత్పతన్మౌళివైడూర్యసందర్శనత్రస్తలీలాశుకాలోకజాతస్మితే । దేవజాతస్తుతే ।
ఈశ్వరీశేఖరీభూతసోమస్మయోత్సాదనాభ్యుత్సుకత్వచ్ఛిరఃసంశ్రితప్రాప్తనిత్యోదయబ్రఘ్నశంకాకరస్వర్ణకోటీరసందర్శనానందితస్వీయతాతాంకకారోహణాభీప్సులబ్ధాంతికార్కాత్మజానిర్ఝరాశంకనీయాంతకస్తూరికాచిత్రకే । వార్ధిరాట్పుత్రికే ।
మాన్మథశ్యామలేక్ష్వాత్మధన్వాకృతిస్నిగ్ధముగ్ధాద్భుతభ్రూలతే ।
శోణబింబప్రవాలాధరద్యోతవిద్యోతమానోల్లసద్దాడిమీబీజరాజిప్రతీకాశదంతావలే ।
గత్యధః క్లృప్తదంతావలే ।
త్వత్పతిప్రేరితత్వష్టసృష్టాద్భుతాతీద్ధభస్మాసురత్రస్తదుర్గాశివత్రాణసంతుష్టతద్దత్తశీతాంశురేఖాయుగాత్మత్వసంభావనాయోగ్యముక్తామయప్రోల్లసత్కుండలే । పాలితాఖండలే ॥
