ప్రభుస్త్వం జగతాం స్వామిన్ వశ్యం సర్వం తవాస్తి చ
అహమజ్ఞో విమూఢోస్మి త్వాం న జానామి హే ప్రభో

బ్రహ్మా త్వం చ తథా విష్ణుస్త్వమేవ చ మహేశ్వరః
తవ తత్త్వం న జానామి పాహి మాం పరమేశ్వర

త్వం పితా త్వం చ మే మాతా త్వం బన్ధుః కరుణానిధే
త్వాం వినా నహి చాన్యోస్తి మమ దుఃఖవినాశకః

అన్తకాలే త్వమేవాసి మమ దుఃఖ వినాశకః
తస్మాద్వై శరణోహం తే రక్ష మాం హే జగత్పతే

పితాపుత్రాదయః సర్వే సంసారే సుఖభాగినః
విపత్తౌ పరిజాతాయాం కోపి వార్తామ్ న పృచ్ఛతి

కామక్రోధాదిభిర్యుక్తో లోభమోహాదికైరపి
తాన్వినశ్యాత్మనో వైరీన్ పాహి మాం పరమేశ్వర

అనేకే రక్షితాః పూర్వం భవతా దుఃఖపీడితాః
క్వ గతా తే దయా చాద్య పాహి మాం హే జగత్పతే

న త్వాం వినా కశ్చిదస్తి సంసారే మమ రక్షకః
శరణం త్వాం ప్రపన్నోహం త్రాహి మాం పరమేశ్వర

ఈశ్వర ప్రార్థనాస్తోత్రం యోగానన్దేన నిర్మితమ్
యః పఠేద్భక్తిసంయుక్తస్తస్యేశః సంప్రసీదతి

ఇతి శ్రీ యోగానన్ద తీర్థ విరచితం ఈశ్వర ప్రార్థనా స్తోత్రం సంపూర్ణం