ఓం నమో నారాయణాయ అష్టాక్షర మాహాత్మ్యం (Om Namo Narayanaya Ashtakashara Mahatyam)
శ్రీశుక ఉవాచ
కిం జపన్ ముచ్యతే తాత సతతం విష్ణుతత్పరః |
సంసారదుఃఖాత్ సర్వేషాం హితాయ వద మే పితః || 1||
వ్యాస ఉవాచ
అష్టాక్షరం ప్రవక్ష్యామి మంత్రాణాం మంత్రముత్తమం |
యం జపన్ ముచ్యతే మర్త్యో జన్మసంసారబంధనాత్ || 2||
హృత్పుండరీకమధ్యస్థం శంఖచక్రగదాధరం |
ఏకాగ్రమనసా ధ్యాత్వా విష్ణుం కుర్యాజ్జపం ద్విజః || 3||
ఏకాంతే నిర్జనస్థానే విష్ణవగ్రే వా జలాంతికే |
జపేదష్టాక్షరం మంత్రం చిత్తే విష్ణుం నిధాయ వై || 4||
అష్టాక్షరస్య మంత్రస్య ఋషిర్నారాయణః స్వయం |
ఛందశ్చ దైవీ గాయత్రీ పరమాత్మా చ దేవతా || 5||
శుక్లవర్ణం చ ఓంకారం నకారం రక్తముచ్యతే |
మోకారం వర్ణతః కృష్ణం నాకారం రక్తముచ్యతే || 6||
రాకారం కుంకుమాభం తు యకారం పీతముచ్యతే |
ణాకారమంజనాభం తు యకారం బహువర్ణకం || 7||
ఓం నమో నారాయణాయేతి మంత్రః సర్వార్థసాధకః |
భక్తానాం జపతాం తాత స్వర్గమోక్షఫలప్రదః |
వేదానాం ప్రణవేనైష సిద్ధో మంత్రః సనాతనః || 8||
సర్వపాపహరః శ్రీమాన్ సర్వమంత్రేషు చోత్తమః |
ఏనమష్టాక్షరం మంత్రం జపన్నారాయణం స్మరేత్ || 9||
సంధ్యావసానే సతతం సర్వపాపైః ప్రముచ్యతే |
ఏష ఏవ పరో మంత్ర ఏష ఏవ పరం తపః || 10||
ఏష ఏవ పరో మోక్ష ఏష స్వర్గ ఉదాహృతః |
సర్వవేదరహస్యేభ్యః సార ఏష సముద్ధౄతః || 11||
విష్ణునా వైష్ణవానాం హి హితాయ మనుజాం పురా |
ఏవం జ్ఞాత్వా తతో విప్రో హ్యష్టాక్షరమిమం స్మరేత్ || 12||
స్నాత్వా శుచిః శుచౌ దేశే జపేత్ పాపవిశుద్ధయే |
జపే దానే చ హోమే చ గమనే ధ్యానపర్వసు || 13||
జపేన్నారాయణం మంత్రం కర్మపూర్వే పరే తథా |
జపేత్సహస్రం నియుతం శుచిర్భూత్వా సమాహితః || 14||
మాసి మాసి తు ద్వాదశ్యాం విష్ణుభక్తో ద్విజోత్తమః |
స్నాత్వా శుచిర్జపేద్యస్తు నమో నారాయణం శతం || 15||
స గచ్ఛేత్ పరమం దేవం నారాయణమనామయం |
గంధపుష్పాదిభిర్విష్ణుమనేనారాధ్య యో జపేత్ || 16||
మహాపాతకయుక్తోఽపి ముచ్యతే నాత్ర సంశయః |
హృది కృత్వా హరిం దేవం మంత్రమేనం తు యో జపేత్ || 17||
సర్వపాపవిశుద్ధాత్మా స గచ్ఛేత్ పరమాం గతిం |
ప్రథమేన తు లక్షేణ ఆత్మశుద్ధిర్భవిష్యతి || 18||
ద్వితీయేన తు లక్షేణ మనుసిద్ధిమవాప్నుయాత్ |
తృతీయేన తు లక్షేణ స్వర్గలోకమవాప్నుయాత్ || 19||
చతుర్థేన తు లక్షేణ హరేః సామీప్యమాప్నుయాత్ |
పంచమేన తు లక్షేణ నిర్మలం జ్ఞానమాప్నుయాత్ || 20||
తథా షష్ఠేన లక్షేణ భవేద్విష్ణౌ స్థిరా మతిః |
సప్తమేన తు లక్షేణ స్వరూపం ప్రతిపద్యతే || 21||
అష్టమేన తు లక్షేణ నిర్వాణమధిగచ్ఛతి |
స్వస్వధర్మసమాయుక్తో జపం కుర్యాద్ ద్విజోత్తమః || 22||
ఏతత్ సిద్ధికరం మంత్రమష్టాక్షరమతంద్రితః |
దుఃస్వప్నాసురపైశాచా ఉరగా బ్రహ్మరాక్షసాః || 23||
జాపినం నోపసర్పంతి చౌరక్షుద్రాధయస్తథా |
ఏకాగ్రమనసావ్యగ్రో విష్ణుభక్తో దృఢవ్రతః || 24||
జపేన్నారాయణం మంత్రమేతన్మృత్యుభయాపహం |
మంత్రాణాం పరమో మంత్రో దేవతానాం చ దైవతం || 25||
గుహ్యానాం పరమం గుహ్యమోంకారాద్యక్షరాష్టకం |
ఆయుష్యం ధనపుత్రాంశ్చ పశూన్ విద్యాం మహద్యశః || 26||
ధర్మార్థకామమోక్షాంశ్చ లభతే చ జపన్నరః |
ఏతత్ సత్యం చ ధర్మ్యం చ వేదశ్రుతినిదర్శనాత్ || 27||
ఏతత్ సిద్ధికరం నృణాం మంత్రరూపం న సంశయః |
ఋషయః పితరో దేవాః సిద్ధాస్త్వసురరాక్షసాః || 28||
ఏతదేవ పరం జప్త్వా పరాం సిద్ధిమితో గతాః |
జ్ఞాత్వా యస్త్వాత్మనః కాలం శాస్త్రాంతరవిధానతః |
అంతకాలే జపన్నేతి తద్విష్ణోః పరమం పదం || 29||
నారాయణాయ నమ ఇత్యయమేవ సత్యం
సంసారఘోరవిషసంహరణాయ మంత్రః |
శృణ్వంతు భవ్యమతయో ముదితాస్త్వరాగా
ఉచ్చైస్తరాముపదిశామ్యహమూర్ధ్వబాహుః || 30||
భూత్వోర్ధ్వబాహురద్యాహం సత్యపూర్వం బ్రవీమ్యహం |
హే పుత్ర శిష్యాః శృణుత న మంత్రోఽష్టాక్షరాత్పరః || 31||
సత్యం సత్యం పునః సత్యముత్క్షిప్య భుజముచ్యతే |
వేదాచ్ఛాస్త్రం పరం నాస్తి న దేవః కేశవాత్ పరః || 32||
ఆలోచ్య సర్వశాస్త్రాణి విచార్య చ పునః పునః |
ఇదమేకం సునిష్పన్నం ధ్యేయో నారాయణః సదా || 33||
ఇత్యేతత్ సకలం ప్రోక్తం శిష్యాణాం తవ పుణ్యదం |
కథాశ్చ వివిధాః ప్రోక్తా మయా భజ జనార్దనం || 34||
అష్టాక్షరమిమం మంత్రం సర్వదుఃఖవినాశనం |
జప పుత్ర మహాబుద్ధే యది సిద్ధిమభీప్ససి || 35||
ఇదం స్తవం వ్యాసముఖాత్తు నిస్సృతం
సంధ్యాత్రయే యే పురుషాః పఠంతి |
తే ధౌతపాండురపటా ఇవ రాజహంసాః
సంసారసాగరమపేతభయాస్తరంతి || 36||
ఇతి శ్రీ నరసింహ పురాణే అష్టాక్షర మాహాత్మ్యం నామ సప్తదశోధ్యాయః ||